Lleihau Gwastraff Gyda'n Gilydd

Cefndir a chyd-destun

Sut gallwn leihau gwastraff o bob math ar draws y sector iechyd a gofal cymdeithasol?

Mae'r system iechyd a gofal cymdeithasol yng Nghymru yn wynebu heriau digynsail yn sgîl pandemig Covid-19, argyfwng costau byw a'r argyfwng hinsawdd byd-eang. Mewn ymateb i hyn oll, rhaid i ni ddatblygu ffyrdd arloesol o ddefnyddio'r holl adnoddau sydd ar gael yn fwy effeithlon. Mae lleihau gwastraff yn un o agweddau canolog Cynllun Datgarboneiddio Llywodraeth Cymru i ddarparu sector cyhoeddus sero net erbyn 2030.

Ynghylch y Rhaglen ‘Lleihau Gwastraff Gyda'n Gilydd’

Bydd y rhaglen hon yn canolbwyntio ar dair prif thema i helpu i sicrhau'r newidiadau angenrheidiol, gan gynnwys:

• Lleihau – cynhyrchion a gwasanaethau nad ydynt yn hanfodol
• Ailddefnyddio – offer, cyfarpar ac adnoddau eraill
• Ailgylchu – lle bynnag y bo modd, er mwyn lleihau gwastraff ac ôl troed carbon

Bydd y rhaglen yn raddol ac yn ailadroddus er mwyn sicrhau ein bod yn rhannu arferion da presennol ac yn adeiladu ar syniadau arloesol wrth iddynt ddatblygu. Bydd yn darparu ffocws ac ymdrech ar y cyd i ennyn diddordeb pobl yn eu gweithleoedd a'u cymunedau mewn lleihau gwastraff, a hynny'n amlwg. Bydd hefyd yn creu rhwydwaith o weithgorau yng Nghymru ac yn manteisio ar syniadau arloesol Esiamplwyr Bevan, er mwyn symbylu ymgyrch ehangach i sicrhau newid ar draws systemau a gwasanaethau iechyd a gofal.

Cynhelir y rhaglen o fis Medi 2022 tan fis Medi 2024.

Ymunwch â rhwydwaith LNW i leihau gwastraff mewn iechyd a gofal i dderbyn cefnogaeth ac adnoddau!

• Ennill cefnogaeth, adnoddau, a chyfleoedd rhwydweithio gan Gomisiwn Bevan.
• Rhannu a dysgu arferion gorau.
• Cydweithio ar atebion arloesol.

What A Waste!

Mae llunwyr polisi, gwleidyddion a gweithwyr gofal iechyd proffesiynol wedi bod yn trafod ymdrin â gwastraff ym maes iechyd a gofal ers i'r GIG gael ei sefydlu ym 1948. Mae'r adroddiad hwn yn galw am ffocws ar broblem gwastraff amhriodol wrth ddarparu iechyd a gofal cymdeithasol yng Nghymru, a chamau gweithredu brys i ymdrin â hi. Bydd lleihau gwastraff yn gwneud cyfraniad hollbwysig at fynd i'r afael â'r heriau anferth sydd o'n blaenau, a datblygu gwasanaethau a chymorth mwy darbodus a chynaliadwy o safbwynt economaidd a chymdeithasol. Ceir sawl enghraifft dda eisoes o sut mae lleihau, ailddefnyddio, ailbrosesu, adnewyddu, ailgylchu (sef y 5 R) yn llywio arferion yn y GIG, ond mae angen gwneud rhagor o waith. Bydd angen i bawb ysgwyddo cyfrifoldeb a gwneud cyfraniad.

Gweminar Lansio

Ar 19 Ebrill 2023, roedd yn bleser gennym groesawu 220 o weithwyr iechyd a gofal proffesiynol o bob rhan o Gymru i lansio'r rhaglen hon. Ymunodd sawl siaradwr gwych â ni, gan gynnwys y Gweinidog Iechyd, Eluned Morgan, yr Athro Syr Don Berwick, yr Athro Syr Andy Haines a Richard Smith. Mae cyflwyniadau'r siaradwyr hyn ar gael isod.