Cefnogi Goroesi Canser gyda Gwasanaeth Effeithiau Radiotherapi Hwyr

Gall effeithiau hwyr godi sawl mis i flynyddoedd ar ôl radiotherapi, pan fydd cleifion wedi’u rhyddhau o wasanaethau oncoleg sy’n ei gwneud hi’n heriol ceisio’r cymorth cywir, gan y gallai gweithwyr iechyd proffesiynol eraill y maent yn cysylltu â nhw fod yn anghyfarwydd ag adnabod a rheoli sgîl-effeithiau radiotherapi hirdymor. Ar hyn o bryd, nid oes gwasanaeth sefydledig i gefnogi'r cleifion hyn sy'n cael eu trin yn Ne Orllewin Cymru.

Mae radiograffwyr yn gweld cleifion yn ddyddiol wrth iddynt ddarparu radiotherapi. Maent yn ymwybodol iawn o sgîl-effeithiau tymor byr a hirdymor radiotherapi y mae cleifion yn eu profi. Mae rhai radiograffwyr yn dod yn bresgripsiynwyr anfeddygol ac yn darparu gwasanaeth adolygu triniaeth i gefnogi cleifion yn ystod radiotherapi, gan eu gwneud yn weithwyr iechyd proffesiynol delfrydol i ddarparu cefnogaeth barhaus i gleifion â sgil-effeithiau hirdymor.

Rydym yn bwriadu sefydlu gwasanaeth effeithiau hwyr i reoli sgîl-effeithiau triniaeth radiotherapi ar gyfer pob safle canser a gaiff ei drin. I ddechrau byddwn yn sefydlu gwasanaeth effeithiau hwyr peilot dan arweiniad radiograffydd yn Ysbyty Singleton ar gyfer cleifion sydd wedi cael radiotherapi radical ar gyfer canser y prostad ym mwrdd iechyd Hywel Dda. Bydd cleifion sy'n cael eu hatgyfeirio at y gwasanaeth yn dechrau rheolaeth gychwynnol ar sgîl-effeithiau ac, os oes angen, yn cael eu cyfeirio at arbenigwyr i gael rheolaeth ychwanegol. Bydd ein dull arloesol yn defnyddio data PROMS digidol (mesurau canlyniadau a adroddir gan gleifion) i ddangos effaith y gwasanaeth ar symptomau cleifion ac ansawdd bywyd. Rydym yn obeithiol y bydd hyn yn llwyddiannus ac y gall y gwasanaeth ehangu ymhellach ar gyfer cleifion mewn byrddau iechyd eraill a safleoedd tiwmor.